Áhöfnin á Halastjörnunni
Áhöfnin á Halastjörnunni var ræst út árið 1980 þegar Gylfi Ægisson leitaði til Rúnars með lögin sín í farteskinu. Hljómplötuútgáfan Hljómar hafði áður gefið út 2 fyrstu sólóplötur Gylfa þar sem hann söng flest lögin. Nú vildi Gylfi fá ýmsa söngvara til að flytja lögin sín og fékk Rúnar til að safna saman góðri áhöfn.
Þeir sem voru kallaðir til voru Rúnar sjálfur, Viðar Jónsson, Ari Jónsson, Engilbert Jensen, Grettir Björnsson, María Helena, Þórir Baldursson og María Baldursdóttir.
Platan var tekin upp í Hljóðrita og útkomuna þekkja flestir Íslendingar. Lög eins og „Stolt siglir fleyið mitt“ og „Ég hvísla yfir hafið“ urðu fastur dagskrárliður í útvarpinu árið 1980 og næstu ár á eftir. Platan var ein mesta selda plata ársins og „Stolt siglir fleyið mitt“ mest spilaða lag ársins.
Á næstu árum var það árlegur viðburður að Áhöfnin á Halastjörnunni var kölluð í hljóðver og lög Gylfa Ægissonar tekin upp. Aldrei kom Áhöfnin fram sem hljómsveit en ýmsir áhafnarmeðlimir voru kallaðir til sem gestasöngvarar hjá hljómsveitinni Geimsteini þegar mikið lá við. Árið 1981 kom út platan „Eins og skot“ og þar var kynntur nýr háseti að nafni Hermann Gunnarsson sem fór á kostum í laginu „Út á hafið bláa“. Ári síðar var gefin út platan „Úr kuldanum“ og aftur var það Hemmi Gunn sem stal dansgólfinu með laginu „Út á gólfið“. Gylfi Ægisson sagði síðan skilið við áfengið með laginu „Vertu sæll herra Bakkus“.
Síðasta plata Áhafnarinnar kom síðan út 1983 og bar nafnið „Ég kveðju sendi-herra“. Nokkrir ódauðlegir smellir voru á þeirri plötu s.s. „Á leið í land“ og „Oftast út á sjó“. Einn áhafnarmeðlimur var þó undir lögaldri og var þar á ferðinni Páll Óskar sem var að stíga sín fyrstu spor á söngferlinum.
Samhliða þessari útgerð Halastjörnunnar vann Gylfi sönglög við nokkur þekkt ævintýri sem sett voru í nýstárlega búninga. Gefnar voru út 3 ævintýraplötur sem hafa selst jafnt og þétt síðustu tvo áratugi og seljast enn. En Halastjarnan seldi lagakvótann til Gylfa sem hefur gert út sjálfur í rúm 20 ár og oft náð góðum afla.
